Қолөнершілер шығармашылығының Бекжан Батырдың 310 жылдығына (1709-1730) арналған   халықаралық фестиваль-конкурсына қатысушыларды жоғары шеберлік пен жаңашылдық дараландыра түсті. Фестиваль 13 қыркүйекте «Рухани жаңғыру»  бағдарламасы мен «Асыл мұра» шағын бағдарламасы аясында Семей қаласында өтті. Оны ұйымдастырушылар қатарында музей-қорықтың халықтық және сәндік-қолданбалы өнер бөлімі де  болды.

Фестивальға Шығыс Қазақстанның, сондай-ақ, Павлодар, Жамбыл және  Алматы облыстарының  қолөнершілері қатысты. Ал Қырғызстаннан, Өзбекстаннан, Ресейден, Қытай мен Моңғолиядан арнайы шақырумен келгендер оның құрметті қонақтары болды. Іс-шараның мақсаты: Қазақстанның халықтық қолөнерін жаңғыртып, танымал ету, дарынды һәм өзіндік айтары бар шеберлерді тауып, қолдау көрсету, сонымен қатар  халықтық және сәндік-қолданбалы өнердің жаңа бағыттарын анықтау, сондай-ақ, жастар бойында қолөнершілік шығармашылығына деген қызығушылықты қалыптастыру.

Конкурс бес аталым бойынша өтті.  Жеңімпаздар қатарында облыс орталығының шеберлері де бар. Олар: Наталья Кузнецова («Жоғары шеберлік»),  Алёна Кузьмина («Кәсіпкерлік»), Байболат Дәлентаев   («Дизайндағы жаңашылдық»). Ал үздік бұйым жасаған Сергей Родионовқа бас жүлде (Гран-при) бұйырды.

Музей-қорықтың баспасөз қызметі.