2011 жылдың 1 қыркүйегінде Өскемен қаласында Солжағалық кешеннің этноауылындағы ұйғыр қонысында мұражай-қорықтың қызметкері Қ. Нұрғалиев атындағы мектеп-гимназияның 9 А-сыныбының оқушылары үшін «Роза-рамзан» -  ұйғырлардың ұлттық діни мерекесі» атты лекция оқыды.

Лекция барысында азсанды этнотоп  бөлімінің маманы Іңкәр Баубаева келушілерді Қазақстанда тұратын ұйғыр халқының мәдениеті, тұрмысы және салт-дәстүрі жайындағы мәліметтермен таныстырды, оған оқушылар ерекше қызығушылық танытты.

Мұсылман күнтізбесі бойынша  Ораза айттың соңғы күні биыл 1 қыркүйекте мерекеленді. Осы орайда әрбір мұсылман халқы бұл қасиетті күндерді өзінің салт-дәстүрлік ерекшелігі бойынша өткізетінін айту керек. Сондықтан ұйғыр халқының ораза айт - «Роза-рамзанды» қалай мерекелейтіні жас тыңдаушылар үшін таңсық болды.

Іс-шараның негізгі мақсаты болашақ ұрпақты білімділікке, сыйластыққа шақыру болып табылады. Ұлтаралық мызғымас бірлікті сақтау және достығымызды нығайту ең алдымен нәтижелі тәрбиенің жемісі болмақ.

Іс-шара соңында сынып жетекшісі Анар Аманғазықызы Нұртазалиева бізге шексіз алғысын білдіріп, осындай тәрбиелік маңызы зор іс-шаралар жиі өткізілсе, оларға мектеп оқушылары  қатысып жүрсе нұр үстіне нұр болар еді деген ұсынысын айтты.

Іс-шараға қатысқандардың пікірлері:

Еркежан Рахатова – сынып белсендісі: «Сыныбымызбен бірге этноауылды тамашалап,  ұйғыр қонысымен таныстық. Ұйғыр халқы туралы жаңа ақпарат алдым».

Арман Зейноллаев – сыныптағы ең үздік спортшы: «Мен спортты сүйетінмін, бірақ бұл жолы тарихқа деген қызығушылығым оянғандай. Сыныппен бірге тамаша күн өткізгеніме қуаныштымын».

«Роза-рамзан» -  ұйғырлардың ұлттық діни мерекесі» лекциясының тек тәрбиелік мақсатта ғана өткізілмей, сонымен қатар тарих пәнімен сабақтасып, білімділікті арттыруға  үлкен үлес қосқаны анық.

Іңкәр Баубаева