ШҚО мәдениет, архивтер және құжаттама басқармасына қарасты «Ертіс концерт» КМҚК шығармашылық ұжымдарының 2019 жылдың 30 тамызы күні музей-қорықтың Солжағалық кешенінде болған концерті Қазақстан Республикасының Конституциясы күніне арналды. Этноауылдың орталық алаңында үрмелі аспаптар оркестрі қазақ композиторларының марштарын орындады. Бас сахнада Байжігіт атындағы қазақ халық аспаптары оркестрі (бас дирижері Ш. Рысханов, дирижері Е. Қасымханов) әншілердің қатысуымен концерт қойды. Онда халықаралық және республикалық конкурстар мен фестивальдардың лауреаты, мәдениет саласының үздігі Нұргүл Қабдоллаева, облыстық, республикалық және халықаралық конкурстардың лауреаттары Айдар Алтай мен Юлия Юрочкина, республикалық конкурстардың лауреаты Қуаныш Оралбаев және басқалар өздерінің орындау шеберліктерімен көрермендерді тәнті етті. Концерттік бағдарламада қазақстандық композиторлардың патриоттық тақырыптағы шығармалары мен Отан туралы әндері және күйлер орындалды.
Музей-қорықтың баспасөз қызметі.
Суретті түсірген Алексей Мазницын.
