2022 жылғы 18 мамырда ШҚО музей-қорығында Балалар жылына және ТМД елдерінің халықтық мәдениетіне арналған "Музей түні-2022" дәстүрлі акциясы болып өтті. Ашылу салтанаты сағат 18.00-де Қ.Қайсенов атындағы этнобақта бастау алған мерекеге С.Вивекананда атындағы (Нұр-Сұлтан қ.) үндімәдени орталығынан келген қонақтар, қаланың үздік балалар ұжымдары, этномәдени бірлестіктердің өкілдері, "Ертіс-концерттің" вокал орындаушылары қатысты. Кеш жүргізушілері Ж.Дәлелханов пен Ю. Павленко саябақтың орталық алаңында 2 сағаттық бағдарлама өткізді. Қонақтар – үндімәдени орталығының директоры (Нұр-Сұлтан) Санджай Веди мырза мен «Казцинк» ЖШС бас директорының сапаны бақылау жөніндегі кеңесшісі Дилип Джоши мырза құттықтау сөзін  сөйледі.

Сондай-ақ, көптеген көрермен үшін үндінің "масала" шайының дәмін тату, қала қолөнершілерінің жәрмеңкесі, шеберлік дәрістері және ұлттық тағамдар сатылымы ұйымдастырылды. Ауқымды іс-шара саябақтың түрлі алаңдарын, музей-қорықтың көрме корпустарын және этноауылдарды қамтыды. Әрбір келуші осы жерде  этностардың бай мәдени мұрасы әлемін тамашалауға мүмкіндік алды. "Музей түні-2022" акциясының көрермендері қала тұрғындары мен қонақтары, балалы отбасылар, жастар мен егде адамдар, барлығы 1000-нан астам адам болды.