Музей-қорықтың қорындағы жәдігерлер туралы ақпарат Қазақстан Республикасының музейлеріндегі неміс тарихы мен мәдениеті жөніндегі колллекциялардың Тізбесіне енгізіледі.

Тізбені құрастыру ісімен Алматыдағы «Возрождение» неміс мәдени-этникалық қоғамы  шұғылдануда, оның қызметкерлері Шығыс Қазақстанға жасаған этномәдени  экспедиция кезінде музей-қорыққа ат басын тіреген болатын. Экспедиция мүшесі,  тарихшы  Елена Хабарованың түсіндіруінше Қазақстандағы  белгілі бір облыс аумағында тұрып жатқан немістердің тарихы мен мәдениеті жөніндегі этнографиялық коллекциялар,  заттар қоры мен фотодеректік материал  ерекше қызығушылық тудыруда.  Зерттеушілердің пікірі бойынша музей-қорықта неміс халқының тарихи-мәдени мұрасын зерттеу үшін өзіндік құндылыққа ие сирек жәдігерлер сақталған. Мәселен, 1861 жылдан бастап шығарылған «Кішкентай балаларға арналған мектептік жаршының» 1910 жылғы кітаптарын, сондай-ақ үйленутойылық  көйлектер мен гүлтәждер коллекциясын солардың қатарына  жатқызуға болады. Сондай үйленутойылық көйлектердің бірін Большенарым ауданының тұрғыны, 1937 жылы дүниеге келген М.И.Мильдонбергер тапсырған.  Мария Ивановна көйлекті 1957 жылы өзінің тойына арнап тіккен, ал 1991 жылы оны музей-қорыққа сыйлаған екен.

Алматыдан келген зерттеушілер Этноауылдағы неміс қонысында болып қайтты.  «Біздің таңқалғанымыз, - дейді Елена Хабарова. -  Үйдегі әр бөлме неміс керек-жарақтарымен және заттарымен, сондай-ақ жиһазымен жабдықталған.  Барлығы неміс мәнерінде безендірілген. Біздің фотосуретші Юрий Ерёмин түсірген суреттердің бәрі неміс мәдениетінің және этносының Тізбесіне енгізілетін болады».  Елена Анатольевна музей-қорықта барлық жәдігерлердің цифрландырылып, электронды үлгіде жасалғандарына орай ризашылығын білдіріп, экспедиция мүшелеріне көрсеткен көмектері үшін  ШҚО халықтары мен азсанды этнотоптарының этнографиясы бөлімінің меңгерушісі Б.М.Құмароваға, сондай-ақ қор сақтаушыларға алғыс айтты.

 Неміс жәдігерлерінің коллекцияларын зерттеу жөніндегі жобаны  тарих ғылымдарының   кандидаты Ю. И. Подопригора басқарады.  Қазақстанда осы Тізбе негізінде неміс мәдениеті мен этносының виртуалды музейі ашылмақ, оған  ШҚ облыстық сәулет-этнографиялық және табиғи-ландшафттық музей-қорығының жәдігерлері де енетін болады.

Музей-қорықтың баспасөз қызметі.

Фотолар  Юрий Ерёминдікі