27 қарашада Семейдегі Абайдың  мемлекеттік тарихи-мәдени және әдеби-мемориалдық «Жидебай-Бөрілі» музей-қорығында Өскемендегі облыстық музей-қорық қорынан алынған  «Суретші Болат Исин туындыларындағы жазушылар шығармашылығы» атты көрме ашылды. Музейаралық әріптестік шеңберінде ашылған көрмеде Болат Исиннің қазақтың ұлы ақыны Абай мен оның шәкірттері Шәкәрімнің, Әсет Найманбайұлының, Төлеу Көбдікұлының, жазушылар Мұхтар Әуезов пен Оралхан Бөкейдің, Қайым Мұхамедхановтың туындылары желісінде кескіндемемен және акварельмен салған жұмыстары қойылды.

Аталмыш көрмені ұйымдастырушы облыстық музей-қорықтың сирек кітаптар бөлімінің меңгерушісі Гүлжан Кашаку оның ашылу салтанатына абайтанушылар, суретшілер, Мұқан Төлебаев атындағы музыка училищесінің студенттері қатысқаны жайлы әңгімеледі. Директордың ғылыми жұмыс жөніндегі орынбасары Мейрамгүл Қайрамбаева құттықтау сөз сөйледі.

Алдағы уақытта Шығыс Қазақстан облыстық музей-қорығы мен Абай  музей-қорығы арасында музейаралық әріптестікті одан әрі жалғастыру мақсатында 5 жылға бағытталған меморандумға қол қойылды. Меморандум шеңберінде бірлескен көрмелер, конференциялар мен әртүрлі форумдар өткізу көзделіп отыр.

Музей-қорықтың баспасөз қызметі.

Суреттерді Абайдың Семей қаласындағы «Жидебай-Бөрілі»  музей-қорығы ұсынған.