2022 жылдың 6 маусымы күні музей-қорықта Ұлытаудың 72 жастағы тұрғыны, сәулет ескерткіштерін қалпына келтіру шебері, осы жылдың 31 наурызынан бастап Қазақстан аумағының мыңдаған шақырымын еңсеріп, еліміздің 10 қаласына табан тіреген Сәрсенбай Қотырашевпен кездесу өтті. Жиһанкездің мақсаты – еліміздің басқа өңірлерінің тұрғындарын Ұлытау ауданының тарихымен және киелі жерлерімен таныстыру, қолөнершілік кәсіпті дамыту. Кездесуге заманауи сәндік-қолданбалы өнер шеберлері, "Білім инновация" лицейінің оқушылары шақырылды, олар саяхатшының бағыт-бағдары, Отанымыздың қалалары мен елді мекендері тұрғындарымен кездесулері және осынау бір қызық тағдырлы адамның өмірбаяны туралы сұрақтарға жауап алды.
Қадірменді ақсақал құрметіне ежелден келе жатқан ұлттық һәм алғашқы қымыз мерекесі – "Қымызмұрындық" өткізілді. Мерекеге қатысушылардың барлығы Сағыр ауылында дайындалған қымыздан дәм татты. "Атамұра" және "Қазына" ансамбльдерінің өкілдері сазды сәлем жолдады.
Қадірменді қонақ құрметіне музей-қорық нысандары бойынша экскурсия ұйымдастырылды.
Суретті түсірген А. Утеулинова
| < Предыдущая | Следующая > |
|---|
