Солжағалық этнографиялық кешен аумағындағы орталық киіз үйде 2018 жылы «Асыл мұра: қайнаркөздер және дәстүрлер» көрмесі ашылған болатын және әлі күнге дейін жұмыс істеуде. Экспозицияда қазақтардың материалдық және рухани мәдениетінің естелігі арқылы Шығыс Қазақстан аумағында өткен тарихи үдеріс, сонымен қатар, қазақтардың көп қырлы шаруашылық және мәдени өмір салтының ерекшеліктері, қазақ шеберлерінің таным тереңдігі мен философиялық дүниетанымы көрініс тапқан.

Экспозиция археологиядан басталады. Сөрелерде Шілікті және Берел қорғандарын қазу кезінде табылған және қазақ халқының ежелгі мәдениетін бейнелейтін заттар бар.

Көрмеде қазақ этнографиясы бірнеше бөлімдерден тұрады. Бұлар көшпелі мал шаруашылығы, егіншілік пен аңшылық, әскери құрал-жабдықтар, киім, зергерлік өнер, тоқымашылық, кесте тігу, киіз және былғары өндірісі, ағаш өңдеу, музыкалық аспаптар.