Музей-қорықтың Солжағалық кешенінің кіші павильонында Мұхтар Әуезовтың туғанына 120 жыл және Әсет Найманбаевтың туғанына 150 жыл толуына орай «Мұхтар Әуезов пен Әсет Найманбаев туындыларының ұлы Абай шығармашылығымен үндесуі» атты жаңа көрме ашылады.

Көрме Абай Құнанбаевтың, Мұхтар Әуезов пен Әсет Найманбаевтың өмірі мен шығармашылығындағы өзара байланыстар жайлы әңгімелейді. Ә.Найманбаев турасындағы тың материалдар, суретші Болат Исиннің Абай мен М.Әуезов шығармаларының сюжеттері бойынша салған кескіндеме жұмыстары және Әсет Найманбаевтың портреті көрменің нағыз інжу- маржаны болып табылады.

Көрмеге Абайдың, Мұхтар Әуезовтың және Әсет Найманбаевтың  басылымдары, музей-қорықтың қор коллекциясынан алынған музыкалық аспаптар мен интерьер бұйымдары қойылған.

Көрме 2017 жылдың 1 мамырынан бастап қазан айына дейін жұмыс істейді.

Тапсырыстар 26-82-97 (ішкі телефон 105, сирек кітаптар және иконажазу бөлімі), 8 705 418 29 46 телефондары арқылы қабылданады.