2024 жылғы 12 қыркүйекте ШҚО музей-қорығында Шемонайха қаласының суретшілері Вадим Салманханов пен Юрий Шушаковтың «Өнерге деген екі көзқарас» атты көрмесінің вернисажы өтті. Бұл іс-шараның мақсаты-жергілікті, Шығыс Қазақстандық суретшілердің өнерін өсіп келе жатқан жас ұрпаққа ұсыну болды. Көрменің ашылуына Вадим Салманхановтың өзі білім алған Құмаш Нұрғалиев атындағы Жоғары колледждің студенттері, суретші әріптестері, сондай-ақ қала тұрғындары мен қонақтары қатысты. Портреттік кескіндеме мен пейзаж жанрында салынған Юрий Шушаковтың туындылары вернисаж қонақтарына терең әсер қалдырса, Вадим Салманхановтың аэрография техникасындағы жұмыстары көрмеге ерекше нәзіктік сыйлады. Көрме қазан айының соңына дейін өз жұмысын жалғастырады.