2019 жылдың 15 қарашасы күні музей-қорықтың ақпараттық-ағартушылық бөлімінің меңгерушісі Шынар Кәрібаева мен бөлім қызметкері Анастасия Григорьева танымал қазақ жазушысы, революционер, ақын, белгілі мемлекет және қоғам қайраткерінің туғанына 125 жыл толуына орайластырылған «С. Сейфуллиннің өмірі мен шығармашылық жолы» атты дәріс өткізді.      

Павлодар облыстық көркемсурет музейі өзінің 55 жылдығын атап өтті. Қазіргі уақытта музейде кескіндеменің, графиканың, мүсіннің, сәндік-қолданбалы өнердің қомақты топтамасы жинақталған. Жалпы, музей қорында 6000-нан астам жәдігер бар. Музей-қорық Павлодар көркемсурет музейімен өңіраралық ынтымақтастық және әріптестік шеңберінде тығыз байланыс орнатқан. Мәселен, көркемсурет музейі ақпараттық-ағартушылық бөлімімен «Орыс музейі: виртуалды филиал» бөлімінің жобасы бойынша әріптестікте.

Музей-қорықтың сирек кітаптар бөлімінің аға ғылыми қызметкері Ольга Осерчева Әсел Қаршаловадан қазақ әдебиетінің ұлы классигі, ақын, ойшыл және ағартушы Абай Құнанбайұлының туғанына 175 жыл толуына арналған эстафетаны қабыл алды. Оның «Қара сөздері» ұрпақтарға бағышталған өсиеттің өзіндік жинағы іспетті. Ольга Николаевна 38-ші қара сөзден үзінді оқыды.

«Күллі адам баласын қор қылатын үш нәрсе бар. Ол әуелі  надандық, еріншектік және залымдық – білім-ғылымның жоқтығы,  дүниеде ешбір нәрсені оларсыз біліп болмайды. Білімге талпынбау хайуандық болады. Еріншектік – күллі дүниедегі өнердің дұшпаны. Ол өз кезегінде талапсыздықты, жігерсіздікті, ұятсыздық пен кедейлікті тудырады.  Залымдық – адам баласының дұшпаны. Адам баласына дұшпан болса, адамнан бөлінеді, бір жыртқыш хайуан қисабына қосылады.

«Марья Моревнада қонақта». 20 қараша күні ағарту және көпшілікпен жұмыс бөлімінің қызметкерлері оқушылармен өткізген театрландырылған ойын бағдарламасы осылай аталды.

«Іс-шарамыздың мақсаты – ең алдымен балалар демалысын танымдық  болмыста өткізу, - дейді бөлім әдіскері Марина Борисенко. – Бұл жерде  балалардың музей-қорықпен танысуына басты назар аударылды. Өйткені,  оларға ертегі арқылы орыс фольклоры туралы түсінік берілді. Театрландырылған бағдарламада сиқырлы домалақ, ұршық және басқа да ертегілер  атрибуттары пайдаланылды. Марья Моревна болса Жалмауыз  кемпір бойында жақсы сезімдерді оятуға тырысып бақты. Оның бұл  талпынысы нәтижелі болды, Жалмауыз кемпір де балалармен бірге көне ертегілерді еске түсіріп, ондағы кейіпкерлердің атын айтатын викториналарды шешті. Қойылымға қатысқан № 10 орта мектебі   мектепалды дайындық сыныбының оқушылары викторинаның барлық сұрақтарына жауап берді. Балалар көне ертегілерді жақсы білетін болып шықты.

ШҚО мәдениет, архивтер және құжаттама басқармасының «Риддер тарихи-өлкетану музейі» КМҚК-да «Рухани жаңғыру» бағдарламасы аясында «Әшекей – халық жанының  айнасы мен тарихы» атты көрме ашылды. Онда қазақ халқының әшекей бұйымдар тақырыбындағы болмысын көрсететін тұрмыстық бұйымдар, сондай-ақ, бейнелеу және қолданбалы өнер заттары орын тепкен. ШҚ облыстық сәулет-этнографиялық және табиғи-ландшафттық музей-қорығының қор топтамаларынан алынған 50-ден астам бұйым қойылды.

Музей-қорықтың Қ. Қайсенов көшесі, 67 мекенжайындағы көрме залдарында Өскемен қаласының «Өмірдің қиын жағдайларында қалған адамдарды әлеуметтік оңалту орталығы» КММ-сінің қызметін алатындар үшін қайырымдылық экскурсиясы өткізілді. Орталық Белоусовка кентінде орналасқан және оның әкімшілігі музей-қорыққа келу үшін шағын автобус бөлген екен.

Музей-қорықтың ағарту және көпшілікпен жұмыс бөлімінің қызметкері Любовь Лазарева келушілерді «Біз – Қазақстан халқы» атты тұрақты экспозициямен және «Ежелгі артефактілерден қазіргі заманға дейін» атты көрмемен таныстырды. Оларда Шығыс Қазақстандағы он музейдің  жәдігерлері қойылған. Экскурсия әлеуметтік жағынан қорғалмаған тұрғындар үшін қолжетімді мәдени мұралар әлеуметтік жобасы шеңберінде өткізілді.

14 қарашада Жамбыл  Жабаев ескерткішінің салтанатты ашылуы ақын  атындағы саябақта өтті. Ескерткіш облыс әкімі Даниал Ахметовтің бастамасымен орнатылды. Оның ашылу салтанатында сөз алған аймақ басшысы Өскеменде мұндай ескерткіштің ашылуы қазақ халқының ұлы перзенттерінің галереясын жасауға қосылған үлкен үлес екенін атап өтті. Саябақ поэзиялық кездесулер мен байқаулар алаңына, Қазақстанның белгілі  мәдениет  қайраткерлерінің мұраларын тарататын орынға айналуы керек.

Алматы облысындағы Ж. Жабаев әдеби-мемориалдық музейінің  басшысы, жыр алыбының немересі Салтанат Жамбылова жиналғандарды қала өміріндегі ұмытылмас оқиғамен құттықтады. Ескерткіштің ашылуына Салтанат Тезекбайқызымен бірге Жамбылдың 1945 жылы туған немересі Жеңісхан Жамбылов та келген екен.

Қ. Қайсенов көшесі, 67 мекенжайында Қазақстан Республикасы ұлттық валюта күніне арналған «Теңге. Тәуелсіздік символы» атты көрме ашылды,

1993 жылы Қазақстан өмірінде шынымен де тарихи оқиға болды. Бұл күні ел жаңа валютаға ие болды. ҚР Президентінің 1993 жылдың 12 қарашасындағы Жарлығымен 1993 жылдың 15 қарашасынан бастап Қазақстан Республикасының аумағында ұлттық валюта – теңге айналымға енді. Содан бері бұл күн Ұлттық валюта күні болып саналады. Ал теңге болса Елтаңбамен, Әнұранмен және Тумен қатар Тәуелсіз Қазақстанның   экономикалық және қаржылық символына айналды. Алғашқы ұсақ ақша – тиындар банкнот түрінде жасалды, ал кейінірек металл монеталарға ауыстырылды. 1995 жылы Қазақстанның мәдени және тарихи мұраларын кеңінен паш ету мақсатында мерейтойлық және естелік монеталар шығарыла бастады.

10 қаращада музей-қорықтың орыс этнографиясы бөлімінің қызметкерлері орыс дәстүрлі мәдениетінің «Бастеньки»  ансамблімен бірге атыс қаруын жасау жөніндегі орыс және кеңес конструкторы,  әлемге әйгілі Калашников автоматын жасаушы Михаил Калашниковтың (1919 – 2013 жж.) туғанына 100 жыл толған   мерейтойына арналған салтанатқа қатысып қайтты.  Салтанат атақты қарушының туған жері – Алтай өлкесінің Курья селосында өтті. Михаил Тимофеевич Калашников 1919 жылдың 10  қарашасында дүниеге келген. Ол өзінің ең алғашқы өнертабысын  әскер қатарында жүргенде жасады. 1941 жылы ауыр жараланып,    госпитальда жатқан кезде оған өз қолымен автомат жасау идеясы келеді, Ол автомат арада біраз жыл өткен соң, 1947 жылы таныстырылды.

Музей-қорық Новосібір қаласындағы бірқатар мекемелермен өзара түсіністік және келісім, сондай-ақ, әріптестік туралы меморандумға қол қойды. Бұлар Новосібір облысының «Новосібір мемлекеттік өлкетану музейі» мемлекеттік автономиялық мәдениет мекемесі, «Р.А.Шило атындағы Новосібір зообағы» МУМ және Ресей Ғылым академиясы Сібір бөлімшесінің Орталық Сібір ботаника бағы.

Әріптестері музей-қорық директорының экспозиция-көрме жұмыстары жөніндегі  орынбасары Евгения Рахматулинаны туған күнімен құттықтады. Осы бір  сәттің  Евгения Юрьевнаға тарих ғылымдарының кандидаты атағының берілуімен сәйкес келуі ерекше еді.  Е. Ю. Рахматулинаға бұл ғылыми дәрежені Алтай мемлекеттік университетінде (Барнаул қ.) қорғаған диссертациясы үшін Ресей Федерациясы Ғылым және жоғары білім министрлігі тағайындаған-ды. Диссертацияның тақырыбы – «Шығыс Қазақстанның 1920-1930 жылдарғы кеңестік модернизация жағдайындағы көркем интеллигенциясы».

2019 жылдың 8 қарашасы күні музей-қорық тұңғыш рет республикалық «Музейлер шеруі» акциясына қосылып, оған қатысушы болады. Іс-шараның мақсаты – Шығыс Қазақстан аумағында тұратын халықтың ұлттық құндылықтарын, тарихын, мәдениеті мен салт-дәстүрін танымал ету.